Teksa këtë të diel ndodhet në Vlorë, kryeministri Edi Rama i është shfaqur shqiptarëve live në podkastin “Flasim” ku foli për indeksimin e pagave në sektorin publik me mekanizma shtesë.
“Nga qershori pagat do të rriten edhe në disa sektore të shërbimit publik. Shtesat do të arrijnë në 80 mijë lekë në muaj për mjekët”, u shpreh Rama, duke hapur kështu ‘thesin’ e premtimeve elektorale teksa po afrojnë zgjedhjet lokale
Sipas tij qeveria do të indeksojë pagat çdo dy vite dhe do të bazohet tek një skemë e rritjes së përvitshme të pensioneve.
Gjatë fjalës ‘live’ në podcastin e tij ‘Flasim’, Rama tha gjithashtu se shqiptarë nga e gjithë bota do të jenë në Tiranë për Samitin e Diasporës.
“Në javën që nis nesër, mirëpresim në Tiranë Samitin e Diasporës. Edicioni i katërt që mbledh edhe njëherë shqiptarët nga të gjitha anët e botës. Ata që jetojnë e punojnë jashtë vendit, por sytë i kanë në Shqipëri. E nisim në 13 prill me ceremoninë e mirëseardhjes, ku vëmendja do të jetë te njerëzit dhe te historitë e tyre të punës, të suksesit dhe përkushtimit, që janë edhe histori krenarie shqiptare anembanë.
Por njëkohësisht edhe një hapje për vlerësim. Vlerësim jo vetëm për shqiptarët, por edhe për miq të tyre, miq të huaj, që kanë zgjedhur të jenë pjesë e rrugës së shqiptarëve. Sot diaspora është një forcë konkrete zhvillimi dhe vjen në këtë samit për herë të parë pas një përfshirjeje historike në zgjedhjet politike të vendit.
Ajo vjen si një hapësirë e zgjeruar e Shqipërisë përtej kufijve të saj dhe kthehet në një realitet shqiptar në transformim të vazhdueshëm, gjithmonë e më tepër si një partner. Sfida jonë nuk është vetëm të mbajmë këtë lidhje në një nivel simbolik, por të strukturojmë një rrjet të tërë zemrash që rrahin për Shqipërinë anembanë”, tha mes të tjerash Rama.
