Presidenti i Shteteve të Bashkuara, Donald Trump, deklaroi se afati për Iranin për rihapjen e Ngushticës së Hormuzit përfundon të martën dhe nuk do të ndryshojë më.
Trump ka vendosur më parë disa afate gjatë konfliktit, të cilat më pas janë shtyrë. Këtë herë, ai theksoi se bëhet fjalë për një afat përfundimtar.
Duke komentuar përgjigjen e Iranit ndaj një propozimi amerikan për përfundimin e luftës, presidenti e cilësoi atë si një hap të rëndësishëm, por të pamjaftueshëm.
“Ata paraqitën një propozim. Është një hap i rëndësishëm, por nuk mjafton,” u shpreh Trump. Ai shtoi se lufta mund të përfundojë shpejt nëse Irani ndërmerr veprimet e kërkuara, duke theksuar se negociatat po zhvillohen, sipas tij, në mirëbesim.
Presidenti amerikan deklaroi gjithashtu se ka “shumë alternativa” në dispozicion ndërsa konflikti vazhdon. Ai theksoi se Shtetet e Bashkuara mund të tërhiqen në çdo moment, por shtoi se synon ta çojë situatën drejt një përfundimi.
“Ne mund të largohemi tani dhe do t’u duheshin vite për të rindërtuar atë që kishin. Por unë dua ta përfundoj këtë,” tha Trump.
Ai përsëriti qëndrimin se Irani nuk duhet të zotërojë armë bërthamore, ndërsa Teherani vazhdon ta mohojë një synim të tillë.
Deklaratat e Trump vijnë në një moment kritik për konfliktin, ndërsa mbetet e paqartë nëse ky afat përfundimtar do të çojë drejt një marrëveshjeje apo një përshkallëzimi të mëtejshëm.
