Në Komisionin për Evropën dhe Punët e Jashtme, teksa u diskutua për deklaratën e Taulant Ballës në Kuvend ndaj Albana Vokshit, deputeti i PS, Vasil Llajo, replikoi me demokraten Ina Zhupa.
Llajo u shpreh se ka një marrëdhënie miqësore me Ina Zhupën, duke shtuar se “kanë ndarë gotën e verës bashkë para fushatës”.
Deputetja demokrate e mohoi kategorikisht këtë deklaratë, duke thënë se nuk e ka njohur më parë Llajon dhe se nuk konsumon verë, gjë që sipas saj e dinë të gjithë kolegët.
Zhupa e cilësoi pohimin e Llajos si “fryt i dëshirës dhe fantazisë”.
Biseda:
Llajo: Me zonjën Zhupa ne jemi shumë miq. Madje kemi ndenjur dhe kemi ndarë gotën e verës bashkë para fushatës. Kështu që le të jetë kjo një frymë e përbashkët, që debatin politik dhe frontin politik t’i ndajmë me njëri-tjetrin, por jo të zbresim në nivele denigruese dhe morale ndaj njëri-tjetrit.
Zhupa: Për sqarim, nuk është e vërtetë. Zotin Llajo nuk e kam njohur. Unë nuk pi verë dhe këtë e dinë të gjithë kolegët. Kështu që ajo që tha zoti Llajo në fund të fjalës nuk është e vërtetë. Mund të jetë fryt i dëshirës dhe fantazisë, por nuk është e vërtetë.
Llajo: Zonja Zhupa, fantazitë e mia nuk i kalojnë ato të tuat.
