Kreu i grupit parlamentar të PD, Gazment Bardhi, gjatë fjalës së tij në Kuvend, akuzoi mazhorancën se po shkel Kushtetutën për të mbrojtur ministrat dhe zyrtarët e saj, duke iu referuar vendimit unanim të Gjykatës Kushtetuese.
Ai theksoi se ky vendim rrëzon çdo pretendim se pezullimi i ministrave lidhet me imunitetin e tyre.
“Qëndrimi juaj se pezullimi i ministrave është pjesë e imunitetit kushtetues të ministrit, nëse nuk e keni marrë vesh, është rrëzuar si qëndrim antikushtetues në një votim 8 me 0 nga Gjykata Kushtetuese,” deklaroi Bardhi.
Ai shtoi se vendimi i Kushtetueses ka dhënë përgjigje edhe për çështjen e imunitetit të deputetes Belinda Balluku: “Imuniteti nuk është privilegj i Belinda Ballukut, sepse deputetët nuk mund të gëzojnë një privilegj personal. Imuniteti ekziston për të mbrojtur funksionimin demokratik të Kuvendit.”
Bardhi i bëri thirrje mazhorancës të tërheqë propozimin për ndryshimin e Kodit të Procedurës Penale, duke e cilësuar antikushtetues:
“Unë uroj që deputeti Edi Rama të trimërohet, ta heqë mënjanë frikën dhe ta tërheqë propozimin antikushtetues bashkë me dy kolegët e vet.”
