Analisti Baton Haxhiu thotë se PD ka mungesë vizioni në lidership dhe se gjuha e Berishës është e 35 vjet e vjetër.
Analisti deklaroi se PS-në, me gjithë problemet që ka, sot e mban në pushtet pikërisht Sali Berisha, pasi kështu mban edhe veten.
“Po e shikoni diskursin që përdor doktori, janë po aq, 35 vite të vjetra. “Do të shkruhet me shkronja të arta”. “Ky është momenti historik”. “Historia e rrëzimit”. Ajo që përmend doktori nuk ekziston. Ajo që ekziston në gjuhën e tij, është diskursi që i pëlqen vetëm pushtetit.
Mund të them, duhet të jesh shumë i paaftë në strategjinë e lidershipit dhe në paqartësi strategjike, si opozitë, që të mbash pushtetin në këtë mënyrë.
Duke mbajtur pushtetin, ai mban edhe veten. Ajo që sot quhet protestë e opozitës, është dhunë ndaj vetëvetes, krijon imazhin e keq për veten. Nuk ka pozicion strategjik, është vuajtje e pushtetit opozitar dhe liderit të opozitës, i cili ende nuk e ka kuptuar se nuk ndërtohet masa kritike kështu, rrëfimi për masivizimin e protestës dhe aq më keq, që dëshiron ta krijojë atë farë mozaiku të çuditshëm shqiptar, hajde të gjuajmë bomba dhe të shkruhet në Reuters dhe të përcillet te ne sikur kanë shkruar të gjithë mediat e botës. Kjo propagandë nuk ka më kuptimin e viteve ’90. Jemi larg realitetit se si bëhet piar i një strategjie.
PS është në vitin e 14, me kaq ndryshime të njerëzve, me kaq probleme që ka, vetëm një parti si PD mund ta mbajë në pushtet. Është për të ardhur keq, se PS me këto gabime që bën, me mbet’ në pushtet, këta i ruajt Zoti.
I kanë vendosur hekurat dhe mbajën një përmendore të gjallë. Këta janë mburojë e Kryeministrisë. S’kanë as diskurs, as gjuhë, as strategji, asgjë”, tha ndër të tjera Haxhiu.
