Gjykata e shkallës së parë në Shkodër e ka vlerësuar të ligjshëm arrestimin e n/komisar Zef Mirashit, i arrestuar nga shërbimi i kontrollit të brendshëm teksa po transportonte 10 kilogram lënde narkotike kanabis sativa.
Seanca gjyqësore për arsye hetimore është zhvilluar me dyer të mbyllura dhe pasi ka dëgjuar palët, kryesuesja e trupës gjykuese Ermira Dedja vendosi ndaj 48 vjeçarit Mirashi masën e sigurisë “arrest me burg”, i dyshuar për veprën penale “prodhim e shitje të narkotikëve”.
Avokati mbrojtës Blerim Bazhdari dhe vetë oficeri i policisë kanë kërkuar arrest me burg me afat, ndërsa nga ana tjetër organi i akuzës me provat e paraqitura dhe hetimin disa mujor që ka bërë SHKB, e cila ka ndjekur edhe veprimet e Mirashit kërkoi “arrest me burg” ndaj tij.
Oficeri i policisë Zef Mirashi u arrestua nga SHKB mbrëmjen e së mërkurës në dalje të Shkodrës me 10 kilogram kanabis të cilën e kishte fshehur brenda automjetit të tij. 48 vjeçari i cili prej 15 vitesh është në radhët e policisë, ishte mbajtur në vëzhgim nga agjentët e policisë kriminale dhe asaj të antidrogës , të cilët kishin ndjekur të gjitha lëvizjet e tij, ndërsa kishin përgjuar edhe telefonatat që ai kishte bërë gjatë kësaj periudhe.
Të bindur në të gjitha provat e grumbulluara nga ky hetim i kryer prej tyre, ata vendosen t’i vinin prangat kolegut 48 vjeçar ndërsa ai po ekzekutonte lëvizjen e sasisë prej 10 kilogramësh të lëndës narkotike.
Mirashi që mbante gradën Nenkomisar, ishte me detyrë Komandant i Postës policore të Vermoshit. Tashmë hetimet do të vijojnë për të mësuar lidhjet e tij dhe destinacionin e lëndës narkotike që ju kap si provë materiale në makinë.
