Nga Luca Arnau – LaCapitaleNews
Një shpërthim poshtë shtëpisë, një emër që rikthehet nga investigimet televizive, një pistë që kalon Adriatikun dhe mbërrin deri në Miami. Atentati ndaj Sigfrido Ranuccit, i ndodhur më 16 tetor poshtë banesës së drejtuesit të Report, vazhdon të sjellë zhvillime hetimore. Dhe në orët e fundit po merr gjithnjë e më shumë formë ajo që hetuesit e quajnë ‘pista shqiptare’.
Në qendër të vëmendjes është emri i Artur Shehut, 58 vjeç, sipërmarrës me origjinë nga Shqipëria, figurë që në disa investigime gazetareske është përshkruar si i afërt me ambiente të krimit të organizuar të vendit të tij.
Sot Shehu jeton në Shtetet e Bashkuara, në Florida, në Miami, ku bën një jetë të rezervuar dhe larg vëmendjes publike. Sipas burimeve hetimore, edhe Drejtoria Hetimore Antimafia ka marrë informacione nga Vlora, në jug të Shqipërisë, mbi përfshirjen e mundshme të 58-vjeçarit në shpërthimin e ndodhur në Romë.
Pista po ndiqet me kujdes nga Drejtoria Distrektuale Antimafia e Romës, me zëvendësprokuroren Ilaria Calò dhe prokurorin Carlo Villani, së bashku me karabinierët e Njësisë Hetimore të Frascatit dhe të via In Selci, të angazhuar për të rindërtuar çdo detaj të dinamikës. Qëllimi është i dyfishtë: të identifikohet kush e ka vendosur materialisht eksplozivin dhe të gjenden porositësit e mundshëm.
Motivi i hipotezuar, në këtë fazë, lidhet me një puntatë të Report të transmetuar më 21 prill 2024, me titull ‘(Hot) Spot Albanese’. Shërbimi trajtonte projektin e qendrave për migrantë të ndërtuara nga Italia në Shqipëri, në Shëngjin dhe Gjadër, në kuadër të marrëveshjes dypalëshe mes Romës dhe Tiranës.
Në atë kontekst, emri i Shehut përmendej në disa pjesë të emisionit. Dhe vendosej brenda një rrjeti marrëdhëniesh dhe interesash që prekin ambiente politike dhe institucionale shqiptare.
Në programin e Rai3, 58-vjeçari përshkruhej si një sipërmarrës i përmendur më parë në hetime ndërkombëtare për lidhje të dyshuara me ambiente të krimit të organizuar, përfshirë referenca ndaj Cosa Nostra-s dhe Sacra Corona Unita-s. Sipas rindërtimit gazetaresk, Shehu do të kishte dhuruar 30 mijë metra katrorë tokë pranë Vlorës fondacionit të gjeneralit Fabrizio Lisi, në atë kohë kreu i Interpolit në Shqipëri.
Një operacion që, sipas Report, do të ishte ndërmjetësuar nga avokati Enjell Agaçi, sekretar i përgjithshëm i Këshillit të Ministrave të Shqipërisë dhe bashkëpunëtor i kryeministrit Edi Rama, figurë e konsideruar qendrore edhe në përcaktimin e marrëveshjes për emigrantët.
Emri i Shehut nuk ishte i panjohur as për shtypin amerikan. Në mars 2021, Miami Herald i kishte kushtuar atij një investigim të detajuar, duke përshkruar jetën e tij në një vilë në Miami Beach, në Alton Road, mes palmave dhe makinave luksoze. Një portret që përziente biznesin, lidhje të supozuara të diskutueshme dhe një rrjet ndërkombëtar interesash.
Tani hetuesit italianë po verifikojnë edhe këtë profil, duke kryqëzuar informacionet e mbledhura në Shqipëri me lëvizjet dhe kontaktet e mundshme të 58-vjeçarit në Shtetet e Bashkuara. Bëhet fjalë për një fazë ende paraprake. Nuk ka akuza formale, por një sërë elementësh që po analizohen për të kuptuar nëse ekziston një lidhje konkrete mes investigimit televiziv dhe atentatit.
Megjithatë, pistat mbeten të shumta. Report, ndër vite, ka trajtuar tema të ndjeshme: mafia, korrupsioni, tenderët publikë, trafikimet ndërkombëtare.
Hipoteza se atentati mund të lidhet me një investigim specifik nuk përjashton motive të tjera të mundshme. Hetuesit po vlerësojnë edhe tentativën, të ndodhur verën e kaluar, për të hyrë në shtëpinë e dytë të gazetarit, episod që mund të tregojë presion të përsëritur.
Në këtë skenar, pista shqiptare duket sot më e ndjekura, por jo e vetmja. Hetimi po vazhdon në disa drejtime, me synimin për të rindërtuar jo vetëm dorën që vendosi eksplozivin, por mbi të gjitha mendjen që do të kishte vendosur të godiste një nga figurat simbol të gazetarisë investigative italiane.
