Kreu i grupit parlamentar të PS-së, Taulant Balla, në fjalën e tij në Kuvend deklaroi se GJKKO ka ndërhyrë në kompetencat e Kryeministrit në lidhje me rastin e ministres Belinda Balluku.
Duke përdorur gjuhën eprorit të tij, Balla akuzoi kreun e grupit parlamentar të PD-së, Gazment Bardhi, për mashtrim pasi sipas interpretimit të tij, nuk ekziston një vendim i qartë dhe përfundimtar i Gjykatës Kushtetuese me 8 vota pro dhe 0 kundër për këtë çështje.
“Në Kuvendin e Shqipërisë nuk ka kërkesë për heqje imuniteti, sepse as deputetët dhe as ministrat nuk kanë imunitet. Ka kërkesë për dhënie autorizimi për masë sigurie. Sa i përket kërkesës për dhënie autorizimi, si anëtar i atij këshilli, jeni njoftuar në datën 23, ora 10:00, për të vijuar me mbledhjen.
Të gënjesh është edhe profesion dhe ju e ushtroni në mënyrë shembullore.
Thatë që ka vendim të Kushtetueses 8 me 0, por unë di dhe publiku di, edhe gazetarët aty lart e dinë që nuk ka një vendim të tillë. Sa i përket 8 me 0, po, ka një vendim në leximin pa jurisprudencë 8 me 0.
Katër anëtarë thonë që GJKKO ka ndërhyrë në kompetencat e Kryeministrit, Parlamentit dhe Presidentit, por nuk kanë rënë dakord për mënyrën se si zgjidhet. Katër thonë ta zgjidhë Kuvendi, katër thonë ta zgjidhë Gjykata”, u shpreh Balla.
