Një operacion antidrogë është zhvilluar në qytetin e Elbasanit, në kuadër të së cilit janë arrestuar 3 trafikantë droge dhe janë sekuestruar një sasi lënde narkotike.
Sipas raportimeve paraprake, 3 personat janë arrestuar teksa po tentontin të dilnin nga qyteti me makinë, ndërsa në automjetin e tyre janë gjetur dhe sekuestruar të paktën 45 kilogramë kanabis sativa, armë, municion luftarak, një sasi e konsiderueshme parash, si dhe disa telefona celularë me karta SIM shqiptare dhe të huaja.
Mësohet se drejtuesi i mjetit kur ka kuptuar se po ndiqej nga forcat e rendit ka tentuar të largohej me shpejtësi, duke u futur në një rrugë të pandriçuar në një lagje periferike.
Deri më tani identiteti i të arrestuarve nuk është bërë publik, ndërsa mësohet se gjatë operacionit ka mbetur i plagosur një punonjës policie, pasi është dëmtuar nga thyerja e një xhami, por raportohet jashtë rrezikut për jetën.
Hetimet vijojnë për të dokumentuar veprimtarinë kriminale të grupit, i cili dyshohet se operonte prej kohësh në disa qarqe të vendit.
