Javën që lamë pas, Kryeministri Edi Rama u prit me ceremoni në Jerusalem dhe u nderua me Medaljen Presidenciale të Nderit, akorduar nga Presidenti i Izraelit, Isaac Herzog.
Nga entuziazmi i madh i medaljes dhe i fjalimit pompoz që mbajti, duke përsëritur shprehjen se “shtëpia e shqiptarit është e Zotit dhe e mikut”, Rama nuk u hapi vetëm derën izraelitëve, por edhe serverët.
Sipas mediave izraelite, Shqipëria do të ndërtojë qendrën e saj të parë të madhe të të dhënave falë një investimi prej rreth 100 milionë eurosh nga kompania izraelite ADC.
Projekti, i shpallur si sukses i afrimit të marrëdhënieve mes dy vendeve, parashikon që një pjesë e konsiderueshme e infrastrukturës së të dhënave të vendit të administrohet nga një kompani e huaj, me pronarë dhe interesa jashtë Shqipërisë.
Lejet janë dhënë me shpejtësi rekord, toka shtetërore është vënë në dispozicion, energjia “e gjelbër” sigurohet nga shteti dhe financimi mbështetet nga BERZH. Një paketë privilegjesh që për shumë sipërmarrës vendas mbetet ende e paarritshme, por që për një kompani të huaj u bë realitet brenda vetëm 60 ditësh.
Pra gjithçka prezantohet si zhvillim, modernizim dhe integrim europian, ndërkohë që askush nuk shpjegon qartë se çfarë ndodh me të dhënat strategjike të shtetit shqiptar.
“Pas marrëdhënieve më të ngushta midis Izraelit dhe Shqipërisë, kompania izraelite ADC është përzgjedhur për të ndërtuar qendrën e parë të të dhënave në vend. Projekti, i cili do të ndërtohet në një zonë të tregtisë së lirë pranë kryeqytetit Tirana, do të kushtojë rreth 100 milionë euro. Objekti do të bazohet në procesorët grafikë Robin të Nvidia dhe do të ofrojë 32 megavat, me potencial për t’u zgjeruar në 100 megavat.
ADC është në pronësi të përbashkët të Happy Technologies (80%) – një kompani kibernetike dhe informatike në pronësi të Roi Shaposhnik, Noam Frank, Shlomi Avni dhe Itai Melchior; dhe të kompanisë konsulente për qendrat e të dhënave DIT (20%), të kryesuar nga ekspertët Zvika Friedman, Nir Poltorak dhe Dan Carmi”, shkruan media izraelite Globes.
Mesa duket, medaljet apo nderimet që merr Rama për t’u krekosur në rrjetet sociale, kushtojnë marrëveshje të rëndësishme për sigurinë tonë kombëtare.
Më herët, Rama u nderua edhe me medaljen e lartë nga Presidenti i Emirateve të Bashkuara Arabe, Sheikh Mohammed bin Zayed Al Nahyan. Edhe në këtë rast, nderi erdhi pasi kompania Presight AI Ltd, me qendër në Abu Dhabi dhe me kryetar Sulltan Al Jaber, ministër i Industrisë dhe Teknologjisë së Avancuar të Emirateve të Bashkuara Arabe, u caktua të kryejë survejimin e qytetarëve shqiptarë.
Pra, medalja nga sheiku erdhi pas një kontrate prej 140 milionë dollarësh. Bëhet fjalë për një marrëveshje të mbyllur pa garë, ku kompania e regjistruar rishtas do të instalojë mijëra kamera, sensorë dhe pajisje të inteligjencës artificiale, duke administruar të dhënat e qytetarëve, trafikun dhe lëvizjet brenda territorit të Shqipërisë.
LEXO EDHE:
