Një VKM ka lënë pa pagesë transportin e nxënësve për më shumë se shtatë muaj në fshatin Jubë, Durrës.
Lulzim Bega, i cili prej 15 vitesh kryente transportin e nxënësve të shkollës 9-vjeçare nga Juba e Poshtme dhe Juba e Sipërme, vazhdoi shërbimin nga shtatori 2023 deri në mars 2024, por pagesa u ndërpre.
Prindërve iu komunikua se fondet ishin bllokuar për shkak të VKM-së nr. 119.
Transporti përfshinte një distancë mbi 7 km vajtje-ardhje, me një pagesë 130 lekë, ndërsa vlera totale e papaguar arrin rreth 3.5 milionë lekë.
“Pagesat janë bërë në rregull deri në shtator të 2023. Në shtator 2023 deri më 26 mars 2024 mua nuk më paguan më transportin që kisha bërë me nxënësit, sepse nuk ma thanë për momentin por më thanë që do të ndërpritet transporti. Shkova atje, u interesova për punën që kisha, më thanë janë bllokuar me VKM. Unë nuk po kërkoj që të vazhdoj transportin prap sepse është vendim qeverie dhe e ndërpret transportin. Ama, për kaq ditë sa unë kam punuar që kam bërë transportin nga shtatori 2023, deri më 26 mars 2024 mua më jep lekët, se kam shpenzuar naftë edhe kam bërë punën”, u shpreh Bega.
Specialisti i DRAP Durrës, Redi Biturku, thotë se pagesa u pezullua pas një auditi të Ministrisë së Arsimit, i cili konstatoi se për periudhën 2023–2024 përfitimi ishte në kundërshtim me VKM-në, pasi banesa dhe shkolla ndodheshin në të njëjtën njësi administrative.
“Në lidhje me problematiken e fshatit Jubë, jemi në dijeni të faktit dhe këto fëmijë kanë pas marrë pagesë transporti. Në lidhje me një auditim që është bërë nga Ministria e Arsimit dhe bazuar VKM-së 119, rezultoi që këto fëmijë sipas VKM-së së transportit 2023, nuk e përfitonin transportin për shkak se janë fëmijë në të njëjtin vendbanim që kanë shkollën dhe pse i kalojnë 2 km nuk e përfitonin. Në lidhje me përfitimin e transportit pas vitit 2024 të këtyre fëmijëve, bëjnë me dije që është ndryshuar VKM-ja e transportit, vendos ndryshimin e kësaj pike, të lejojë marrjen e transportit, pra i bën përfitues fëmijët të cilët kanë shkollën në të njëjtin vendbanim, të cilët i kalon 2 km. Fakti i pezullimit të transportit vjen për shkak të një auditimi që është kapur dhe thonë që këto nuk e përfitojnë sepse VKM-ja e vjetër nuk i linte të përfitonin sipas dispozitave ligjore”, tha Biturku.
Në vitin 2024, VKM-ja u ndryshua dhe nxënësit u përfshinë si përfitues, por pa fuqi prapavepruese, duke lënë periudhën e kryer të transportit pa pagesë. /Tvklan/
