Dy shqiptarë nga Kukësi, pjesë e një rrjeti ndërkombëtar të trafikut të drogës, janë shpallur fajtorë nga autoritetet britanike për kontrabandë të sasive të mëdha të kokainës drejt Mbretërisë së Bashkuar.
Sipas Agjencisë Kombëtare të Krimit (NCA), Elton Hallaci (32 vjeç) dhe Artur Iseberi (27 vjeç), banues në Liverpool, ishin pjesë e një grupi kriminal të organizuar që trafikonte kokainë nga Meksika dhe Amerika Latine drejt aeroportit të Mançesterit përmes fluturimeve ndërkombëtare.
Hetimet zbuluan se në vitin 2024, kurierë amerikanë udhëtonin pa bagazhe dhe, pasi mbërrinin në Mançester, merrnin valixhe të mbushura me kokainë sipas udhëzimeve të një organizatori të quajtur “Nate”. Droga më pas i dorëzohej bashkëpunëtorëve në Britani, mes tyre edhe dy shqiptarëve, të cilët kujdeseshin për shpërndarjen e saj në disa qytete.
Më 11 maj 2024, tetë valixhe me kokainë mbërritën nga Cancun dhe Barbados. Hetimet treguan se Hallaci dhe Iseberi morën pesë prej tyre, ndërsa në një valixhe të braktisur nga një kurier, autoritetet gjetën 20 pako kokainë nga një kilogram secila. Në total, atë ditë u konstatua se ishin futur rreth 100 kilogramë kokainë.
Një tjetër ngarkesë prej 300 kilogramësh kokainë me pastërti të lartë u tentua të futej në Mançester më 31 maj, por u sekuestrua nga autoritetet britanike.
