Protesta e kamionistëve në Maqedoninë e Veriut ka hyrë në ditën e dytë të saj, duke bllokuar për më shumë se 24 orë pikën e kalimit kufitar të Qafë Thanës.
Si pasojë, kalimi i kamionëve nga të gjitha vendet është ndaluar, duke krijuar radhë të gjata dhe vështirësi të mëdha për transportin ndërkombëtar.
Në këtë pikë kufitare janë bllokuar dhjetëra kamionë, mes tyre edhe mjete transporti nga Turqia dhe Bullgaria.
Situata ka shkaktuar probleme të shumta, veçanërisht për kamionët frigoriferikë që transportojnë produkte ushqimore të prishshme, të cilat rrezikojnë të dëmtohen nëse protesta vazhdon.
Drejtuesit e protestës theksojnë se kërkesa e tyre kryesore lidhet me zgjatjen e afatit të dokumentacionit nga 90 ditë në 180 ditë.
Ata shprehen se deri më tani nuk ka pasur një komunikim zyrtar mbi këtë çështje dhe paralajmërojnë se protesta nuk do të ndalet nëse nuk ka një reagim nga Unioni i Shengenit.
Bllokimi i kufirit në Qafë Thanë pritet të ketë pasoja të ndjeshme në qarkullimin e mallrave dhe zinxhirin e furnizimit, ndërsa autoritetet ende nuk kanë dhënë një zgjidhje konkrete për situatën.
