Për shumë breza, gjyshet kanë trembur fëmijët e vegjël për t’i vënë në gjumë me një shprehje të errët: ”Fli, se vijnë fantazmat!”
Ditët e fundit, mbi 100 shtëpi në fshatin Belerbe të Elbasanit, gjenden në një situatë, ku ndërthuren frika e fëmijëve nga “fantazmat e varreve” me një projekti tërësisht fantazëm të kryebashkiakut Gledjan Llatja, për zgjerimin e varrezave të qytetit.
Pak ditë më parë, një brigadë e zgjeruar punëtorësh të bashkisë së Elbasanit mbollën një rresht të gjatë me fidanë të rinj, në mes të një hapësire rreth 100 metra të gjatë, që ndan pjesën fundore të varrezave të qytetit me një grup të madh shtëpish.
Fillimisht, banorëve iu tha në mënyrë informale se aty do të ndërtohej një park i gjelbëruar. Idea dukej interesante dhe banorët besuan vërtetë në vullnetin e mirë të Bashkisë së Elbasanit.
Por, emocioni paraprak u shua shpejt. Disa prej banorëve që folën për “Boldnews.al” thanë se projekti i ri nuk kishte të bënte aspak me park, por me një ide të kryebashkiakut Llatja për zgjerimin e hapësirës së varrezave.
Në këtë pikë, nisi revolta. Sipas asaj që shohin qytetarët në terren, e kuptojnë se varrezat e reja do të mbërrijnë shumë pranë shtëpive të tyre.
“Ne nuk jemi kundër zhvillimit, por nuk mund të pranojmë që varrezat të na vijnë tek dera e shtëpisë. Nuk mund të jetojmë, duke parë e dëgjuar në çdo moment qarjet e njerëzve që kanë humbur të afërmit e tyre. Do të na tmerrohen fëmijët”, thonë disa prej banorëve, të cilët prej disa ditësh janë angazhuar për përgatitjen e një peticioni drejtuar Bashkisë së Elbasanit, për të ndryshuar projektin e zgjerimit të varrezave nga pjesa e banuar.
Ata thonë se janë pronarë të rregullt të banesave, me çertifikata pronësie e të legalizuara dhe se nuk u kanë marrë ata happësirë varrezave, por Bashkia po ua sjell në shtëpi.
Nuk ka projekt
Qytetarët kundërshtojnë atë që e quajnë “projekt të Bashkisë”. Por, në fakt, projekt nuk ka.
Bianka Çopja, drejtuese e grupit opozitar në Këshillin Bashkiak të Elbasanit thotë për “Boldnews.al” se “nuk ka asnjë vendim për zgjerimin e varrezave të qytetit”.
Ajo thotë se është vënë në dijeni për këtë projekt “fantazëm” nga banorët e zonës dhe se ka përcjellë një kërkesë të qytetarëve drejtuar kryebashkiakut Gledjan Llatja dhe kreut të të Këshillit Bashkiak, Lutfi Lala, në të cilën kërkohen informacione mbi këtë projekt-ide.
Sipas banorëve, projekti, ashtu siç është propozuar apo duke u zbatuar, cënon normat ligjore dhe parimet bazë të mbrojtjes së shëndetit publik, për shkak të afërsisë së varrezave me zonën e banuar, duke rrezikuar kushtet higjeno-sanitare dhe cilësinë e jetesës së banorëve.
Ata konstatojmë se nuk është zhvilluar një proces i rregullt konsultimi publik me banorët e zonës. Ata thonë nuk janë informuar zyrtarisht dhe nuk u është dhënë mundësia të shprehin mendimin apo kundërshtimet e tyre.
Qytetarët kërkojnë t’u dëgjohet zëri
Në vijim të peticionit të tyre, banorët e fshatit pranë varrezave kërkojnë që të jenë të pranishëm në mbledhjen e radhës së Këshillit Bashkiak, ku të kenë mundësi t’u dëgjohet zëri dhe të japin kundërshtitë e tyre për projektin “fantazëm” të Gledjan Llatjas.
Kryekëshilltarja bashkiake e opozitës, Çopja, thotë se Këshilli Bashkiak ka parashikuar të zhvillojë mbledhjen e saj rutinë të Mërkurën e 28 Janarit 2026.
Por, siç konstaton ajo, në “rendin e ditës nuk është përfshirë asnjë diskutim apo miratim projekt-vendimi për zgjerimin e varrezave”, megjithëse punonjësit komunalë të Bashkisë së Elbasanit tashmë kanë nisur piketimin e zonës së punimeve.
Bianka Çopja thotë se në mbledhjen e Këshillit Bashkiak do të diskutohet, ndër të tjera, një projekt-vendim për “Miratimin në parim të fillimit të procedurës për shpronësimin e pasurive pronë private për realizimin e projektit me interes publik “Ndërtimi i rrugës rrotonda e varrezeve -intersektimi i rrugës “Nos Josif”,ndodhur në Z.K 8522 dhe 8527”,nga Bashkia Elbasan dhe burimin e financimit të këtij shpronësimi”.
Por, “nuk ka asnjë vendim për zgjerimin e varrezave”, thotë ajo për “Boldnews.al”
