Nga Boldnews.al
Fiks 15 vite më parë, Edi Rama përdori një videopërgjim mes dy ministrave të LSI-së Ilir Meta dhe Dritan Prifti që në emër të antikorrupsionit të thirrte një protestë të dhunshme që u mbyll me katër protestues të vrarë dhe qindra policë të plagosur. 15 vite më vonë, Edi Rama sheh ish-armikun më 2011 dhe mikun e madh në 2012 dhe sërish armik pas vitit 2017, pra Ilir Metën, të izoluar në burg të sigurisë së lartë, ndërsa veten të lirë e të pasur, duke mbjellë korrupsion, rritur oligarki dhe degdisur mbi 1 milionë banorë të Shqipërisë së rrudhur në numra.
Një ditë dhe shumë ngjarje. Kryeministri rinxorri nga sirtari të njëtin skenar që e përdor për 13 vite; takim me familjarët e katër viktimave në “sallën e hartave”, ku vetë ai flet sesi drejtësia nuk është vënë në vend e gjumi natën se zë dhe më pas vjen koha e karafilave të kuq, shpërndarë në katër vende ku dhanë jetën protestuesit.
Bëri adetin shpejt e shpejt për të përcjellë ata fatkeqë që ende besojnë se drejtësia do të vijë nga duart e atij që i solli dhe i përplasi në dyert e kryeministrisë për pushtet me çdo kusht, paçka se haraçi qe i rëndë. Rama e kish mendjen tjetërvend. Në Vlorë, Ivanka Trump, vajza e presidentit amerikan Donnald Trump dhe bashkëshorti Jared Kushner, vizituan Zvërnecin, i rihodhën edhe një sy Ishullit të Sazanit, ndërsa ndalën më gjatë në Akërni, tre zona ku kanë shprehur interes të investojnë.
Në darkë shkoi edhe Rama, duke u ofruar miqve speciale gjithçka në tepsi, mjafton që të hapin gojën dhe kërkojnë. Në dukje nuk ka ditë më të mbarë për të sesa e sotmja, ndërsa pret të marrë avionin dhe t’i përgjigjet ftesës së Donald Trump si pjesëmarrës në “Bordin e Paqes”, ku do të flitet për të ardhmen dhe rindërtimin e Gazës pas konfliktit gati 1-vjeçar Izrael-Palestinë.
Lobimi, kushtet e pjekura dhe gjeopolitika e SHBA-ve për të përdorur shtete si numra mbështetjeje, mund të jenë të gjitha në lojë. Kryeministri ynë që historinë personale e ka shkruar me penë të artë, ndërsa fatet e qytetarëve me laps plumbi, vijon të qeverisë mbi skandale, por ditët e fundit mori dhuratën me të madhe me prodhim USA. Po a mundet të vihen në lojë fatet e një vendi për interes të pushtetit personal të një njeriu dhe një çete oligarkësh dhe kriminelësh? Koha jo e largët do e tregojë. Ditët e lumtura kthehen me kohë edhe në makthe, por e sotmja ishte delir dhe kaluar delirit për të.
