Një ngjarje e rëndë ndodhi një ditë më parë në Peshkopi ku djali vrau me kallashnikov babain dhe nënën e tij. 26-vjeçari Qemal Sela zbrazi një karikator të tërë mbi dy prindërit Fatmir dhe Zeqimete Sela. Ai ishte kthyer nga Anglia ditët e fundit si i deportuar.
Raportohet se ai ka pasur probleme mendore dhe ka marrë trajtim në Angli. Bazuar tek informacionet e policisë, hetimet janë bazuar në dy pista. E para lidhet me një konflikt me prindërit për pronësinë e një hoteli të familjes te llixhat.
Pista e dytë dhe më e besueshme lidhet me problemet e shëndetit mendor që ka kaluar 26-vjeçari. I pyetur se pse i vrau prindërit, ai ka folur përçart dhe ka thënë se nuk ishin prindërit e tij.
Më vonë ka dhënë një tjetër deklaratë që rrëzonte të parën. “Prindërit i vrava se më vodhën. Po më dilnin disa persona me maska para dhe po më bënin vaksina”, ka thënë i riu.
Nisur edhe nga fjalët e shkëputura, policia beson se i riu ka kaluar kriza në momentet e krimit. Ndërkohë, mësohet se në Angli ai kishte ndërruar emrin. “Unë nuk jam Qemali, e kam emrin Zeqir”, u ka thënë ai hetuesve.
