Presidenti i Shteteve të Bashkuara, Donald Trump, ka deklaruar se Uashingtoni ka ndërmend të mbajë ndikim të gjatë mbi Venezuelën dhe të kontrollojë të ardhurat e saj nga nafta për periudha që shtrihen “shumë më tej” se një vit, pas një interviste të gjatë për gazetën The New York Times.
Trump ritheksoi planet për rolin e SHBA-së në vendin e Amerikës së Jugut, duke thënë se administrata amerikane parashikon të “mbikëqyrë” Venezuelën dhe të menaxhojë burimet e saj të energjisë në një mënyrë që ai e përshkroi si “të dobishme dhe fitimprurëse”.
“Vetëm koha do ta tregojë” sa gjatë do të zgjasë kjo mbikëqyrje, tha Trump kur u pyet për afatin kohor, duke shtuar se shpreson që ai të zgjasë mbi një vit. Ai shtoi se SHBA-ja do të përdorë naftën e Venezuelës, do të ndihmojë në uljen e çmimeve të karburanteve dhe do të sigurojë fonde që, sipas tij, vendi ka nevojë.
Komentet e tij vijnë pak ditë pas një operacioni ushtarak amerikan në Venezuelë në fillim të janarit, ku u kap nga forcat e SHBA-së presidenti i atëhershëm i vendit, Nicolás Maduro. Për këtë konflikt ka pasur reagime të forta ndërkombëtare dhe shqetësime për ndikimin afatgjatë të Uashingtonit në politikat dhe burimet kombëtare të Venezuelës.
Trump gjithashtu tha se Shtetet e Bashkuara janë “në komunikim të vazhdueshëm” me qeverinë e përkohshme në Venezuelë dhe se administrata amerikane planifikon të rindërtojë sektorin e naftës në vend “në një mënyrë shumë fitimprurëse”.
