Moti i keq në vendin tonë vijon të shkaktojë problematika në shumë qytete dhe fshatra, ndërsa pas shiut kanë filluar reshjet e dëborës.
Rrugët në territorin e Qarkut të Shkodrës janë të kalueshme, përfshirë akset ku ka pasur reshje dëbore Bogë-Theth, e Tamarë-Vermosh.
Por në rrugën e Prekalit dhe Kirit, ku pati shembje, disa banorë mbeten ende të izoluar ndërsa grupet e emergjencës nuk kanë arritur të zhbllokojnë zonën.
Bashkitë e qarkut të Shkodrës karakterizohen nga reshje të shiut të shoqëruara me erë, dhe në disa fshatra të Malësisë së Madhe, Zagorë, Vrakë dhe Kelmend, ka probleme me furnizimin me energji elektrike.
Viti i Ri nisi me temperatura nën zero gradë dhe reshje dëbore, por tashmë vendi është përfshirë nga reshjet e shiut, të cilat pritet të jenë më intensive në orët në vijim e të zgjasin deri më 7 janar.
Qarqet më të rrezikuara shfaqen Shkodra dhe Kukësi, por edhe në Vlorë, autoritetet apelojnë për kujdes gjatë të hënës më 5 janar, ku priten reshje të dendura shiu që mund të shkaktojnë përmbytje.
