Kryeministri Edi Rama, është rikthyer në ambjentet e Kryeministrisë, pas përfundimit të prezantimit të projektit “Smart City”.
Në kryeministri e pret e besuara e tij Belinda Balluku, e cila nuk ka lëvizur që aty prej orës 10:30 të mëngjesit të sotëm.
Rama është parë të mbërrijë në institucionin qeveritar pak minuta më parë, ndërsa ka zhvilluar një bisedë telefonike për rreth 15 minuta brenda makinës së tij.
Ky veprim i Ramës, vjen në një kohë kur Këshilli i Imunitetit dhe Mandateve është mbledhur për të shqyrtuar kërkesën e SPAK për arrestimin e Ballukut.
Një USB me materialet e SPAK, është bërë mollë sherri në mbledhje, ku anëtarët socialistë kanë kërkuar që provat duhet të shqyrtohen brenda në mbledhje dhe se USB-ja nuk duhet t’iu jepet anëtarëve që të aksesojnë materialet vetë.
Ndërkohë, prokurorët e SPAK thonë se materiali i USB-së mund të aksesohet nga anëtarët e Këshillit të Mandateve dhe mund t’i kenë provat secili prej anëtarëve.
Në mbledhjen e nisur prej mëngjesit të sotëm flitet për një dakordësi mes PS-PD për shtyrje të mbledhjes, por deri më tani nuk është konfirmuar zyrtarisht.
