Deputeti demokrat, Klevis Balliu, ka deklaruar se Edi Rama po përdor të gjithë pushtetin e tij për të ushtruar presion ndaj drejtësisë.
Sipas tij këto sulme nuk janë vetëm mbrojtje për Belinda Ballukun, por edhe frikë dhe vetëmbrojtje politike për veten e tij pasi pas aferave të Ballukut qëndron përgjegjësia direkte e Ramës.
Ai akuzon më tej pushtetin për ofensivë të hapur kundër drejtësisë dhe cenim të ndarjes së pushteteve.
“Një rast pothuajse i paprecedentë, ku kryeministri përdor gjithë pushtetin për të ushtruar presion mbi drejtësinë, me synimin mbrojtjen e një zyrtareje të përfshirë në afera korruptive dhe nën hetim.
Kjo nuk buron nga besnikëria ndaj Belinda Ballukut, por nga frika dhe vetëmbrojtja politike, pasi pas aferave të saj qëndron përgjegjësia direkte e Edi Ramës.
Për këtë arsye, pushteti ka nisur një ofensivë të hapur ndaj sistemit të drejtësisë, duke cenuar ndarjen e pushteteve, ndërsa në prapaskenë Rama përpiqet ta neutralizojë politikisht Ballukun, nga frika se ajo mund të zbulojë të vërtetën.
Me këtë pushtet nuk mund të ketë diskutim, por vetëm përballje. Më datë 22, të bashkuar në protestë”,- shprehet Balliu.
