Kryeministri hungarez Viktor Orban ka deklaruar se udhëheqësit e Bashkimit Europian po synojnë ta pranojnë Ukrainën në union deri në vitin 2030, duke e lidhur këtë proces me përgatitjen e një konfrontimi të mundshëm ushtarak me Rusinë.
Në një postim në rrjetin social Facebook, Orban tha se Brukseli ka vendosur një datë të synuar për t’u përfshirë në luftë: vitin 2030. Sipas tij, programet e reja të armatimit të nisura nga BE kanë si qëllim përgatitjen e unionit për konflikt deri në atë vit.
“Viti 2030 është gjithashtu data e synuar për pranimin e përshpejtuar të Ukrainës në BE”, theksoi Orban, duke paralajmëruar se ky hap do të sillte pasoja të drejtpërdrejta për sigurinë e kontinentit.
Ai kujtoi se traktati themelues i Bashkimit Europian parashikon detyrimin e shteteve anëtare për të ofruar ndihmë të plotë në rast të një sulmi të armatosur ndaj një vendi të unionit. “Pranimi i Ukrainës, e cila është në luftë, do të thoshte hyrje e menjëhershme e BE-së në luftë”, u shpreh kryeministri hungarez.
