Nga New York Post
Zyrtarë amerikanë po diskutojnë mundësinë që udhëheqësi socialist i Venezuelës, Nicolas Maduro, të lejohet të kalojë vitet e fundit të jetës në luks në një nga vendet më të pasura në botë, ka mësuar The Post, ndërsa fushata e bombardimeve e Presidentit Trump kundër gomoneve të dyshuara për trafik droge mund të afrohet me brigjet e Amerikës së Jugut.
Një burim i lartë i administratës Trump tha se Sekretari i Shtetit, Marco Rubio, ka propozuar mundësinë që Maduro, 63 vjeç, të transferohet në Katar, në emiratin e pasur me gaz që po ndërmjetëson konfliktin.
Tre zyrtarë aktualë dhe dy ish-zyrtarë e përshkruan skenarin si të mundshëm.
‘Katari, Arabia Saudite dhe Emiratet e Bashkuara Arabe pëlqejnë të bëjnë gjëra të tilla. Kjo i ndihmon të ndërtojnë kredenciale me SHBA-në,’ tha një burim pranë administratës.
Megjithatë, një burim i njohur me rolin e Katarit në bisedimet për Venezuelën këmbënguli se Maduro nuk është duke kërkuar vilë në Doha, ku familja mbretërore më herët ndihmoi në ndërmjetësimin e një plani paqeje të propozuar nga Trump mes Izraelit dhe Hamasit. Katari gjithashtu ka strehuar drejtues të lartë të Hamasit, gjë që çoi Izraelin të kryente sulme ajrore në shtator në përpjekje për t’i eliminuar.
‘Është e pavërtetë që Maduro po arratiset drejt Katarit,’ tha kjo palë.
Trump foli për Maduro-n javën e kaluar dhe i kërkoi të japë dorëheqjen menjëherë, ndërsa lideri i rrënuar thuhet se propozoi si kundër-ofertë dorëzimin e pushtetit tek zëvendëspresidentja dhe një amnisti të gjerë për veten dhe aleatët e tij.
Departamenti i Shtetit nuk iu përgjigj menjëherë një kërkese për koment mbi këtë çështje.
Administrata Trump muajin e kaluar e shpalli Maduro-n dhe aleatët e tij si anëtarë të një organizate të huaj terroriste, për t’i dhënë SHBA-së më shumë opsione ushtarake për të goditur brenda Venezuelës. Rubio akuzoi të ashtuquajturin ‘Karteli i Diellit’, i udhëhequr sipas tij nga Maduro, se është ‘përgjegjës për dhunë terroriste’.
Shtëpia e Bardhë ka përdorur këtë klasifikim për të justifikuar sulmet ushtarake ndaj anijeve të dyshuara për trafik droge në Karaibe, përfshirë një sulm të dyfishtë më 2 shtator që vrau të mbijetuarit.
Zëdhënësja e Shtëpisë së Bardhë, Karoline Leavitt, mbrojti ligjshmërinë e sulmeve ndaj mjeteve detare që deri tani kanë vrarë të paktën 80 persona, duke cituar ‘vetëmbrojtjen për të mbrojtur amerikanët dhe interesat jetike të Shteteve të Bashkuara’.
Të hënën pasdite, Presidenti Trump u takua me Rubio-n, Sekretarin e Mbrojtjes Pete Hegseth dhe zyrtarë të tjerë të lartë për të diskutuar hapat e ardhshëm kundër Maduro-s.
Zyrtarët amerikanë po mbledhin informacione për të përgatitur rekomandimet e tyre, dhe një vendim mund të merret më vonë këtë javë ose fillim të javës tjetër.
Një nga hapat e mundshëm që po shqyrtohen është goditja e trafikantëve të drogës brenda ujërave territoriale të Venezuelës, të cilat shtrihen deri në 12 milje detare nga bregu. Një veprim i tillë do të rriste presionin politik ndaj presidentit Trump për të kërkuar miratim nga Kongresi për të hyrë në luftë, ndërsa ligjvënësit e dy partive tashmë kanë kritikuar sulmet aktuale, pa një votim të Kongresit.
Më 23 tetor, Trump tha se po përgatitej të informonte Kongresin për planin e tij për të kryer sulme tokësore brenda Venezuelës, por është tërhequr përkohësisht ndërsa përpiqet të negociojë dorëheqjen dhe ekzilin e Maduro-s.
Gjatë një mbledhjeje të kabinetit të martën, Trump kërcënoi të urdhërojë goditje mbi trafikantët e drogës në tokë, dhe paralajmëroi se operatorët kolumbianë gjithashtu janë në shënjestër.
‘Kushdo që merret me këtë dhe e shet drejt vendit tonë është objektiv sulmi,’ tha Trump. ‘Jo, jo vetëm Venezuela.’
