Anëtari i Këshillit Kombëtar të Partisë Demokratike, Ilir Alimehmeti, ka sqaruar takimin e shumëdiskutuar të disa prej eksponentëve demokratë, të cilët në primare dhe listat e hapura të zgjedhjeve të 11 majit rezultuan ndër më të votuarit.
I ftuar në emisionin News 24, Alimehmeti u shpreh se ky takim nuk ka qenë një lëvizje jashtë strukturave, por një përpjekje për të ngritur një zë që prej muajsh nuk po dëgjohet sipas tij në forcat drejtuese të PD-së.
Alimehmeti shpjegoi se PD historikisht ka funksionuar mbi bazën e diskutimeve me njerëzit dhe që në themel të saj janë fjala dhe vota. Ai theksoi se përfaqësuesit që kanë marrë besimin e qytetarëve kanë përgjegjësi t’i çojnë zërat e tyre më lart, por për shkak të formulimeve të reja të kodit zgjedhor, shumë prej tyre nuk kanë pasur mundësinë të përfaqësohen në Parlament.
“Fjala e tyre megjithatë përfaqëson shumë njerëz. Në këtë aspekt ajo duhej dëgjuar. Tashmë, 6 muaj e gjysmë pas zgjedhjeve, kjo nuk ka ndodhur,” u shpreh ai.
Duke komentuar diskutimet mbi vendin e takimit, ai u shpreh se në kulturën shqiptare shumë punë bëhen në kafe dhe se kjo nuk duhet të jetë çështja kryesore.
“Duket sikur të flasësh është gabim. Është e drejtë që njerëzit që janë pjesë e kësaj tavoline të sqarojnë çfarë ka ndodhur; pastaj aludimet janë të drejta e kujtdo,” tha ai.
Ai shtoi se grupi prej 15 personash që u takua synon vetëm të çojë përpara idetë që demokratët në bazë kërkojnë të dëgjohen. Sipas tij, terreni brenda PD-së ka qenë “i uritur për dialog”, gjë që shpjegon edhe reagimin e madh ndaj këtij takimi.
“Ne e dimë çfarë folëm. Jemi 15 vetë, të gjithë të pavarur. PD ka fjalën e lirë. Po të shihni çfarë themi ne dhe titujt që na vendosin, janë të kundërta,” përfundoi Alimehmeti, duke nënvizuar se e vetmja kërkesë e tyre është respektimi i strukturave të partisë.
Ai theksoi se nuk ka një grupim të ri në PD, ndërsa shtoi se po kërkohen mënyra si të vitalizohet partia që të jetë alternativë qeverisëse.
