Policia spanjolle ka arrestuar 42-vjeçarin shqiptar Shamir Hoxha, i dyshuar për grabitjen spektakolare të një argjendarie në Madrid, ku u morën bizhuteri me vlerë 1.2 milionë euro. Ai u kap më 22 tetor 2025, duke mbajtur në qafë një nga bizhuteritë e vjedhura dhe rreth 3.000 euro.
Grabitja ndodhi më 28 prill 2025, gjatë një ndërprerjeje të madhe të energjisë që çaktivizoi sistemet e sigurisë në qendrën tregtare “Plaza Norte 2”, në San Sebastián de los Reyes. Hetimet zbuluan se Hoxha kishte studiuar për javë të tëra infrastrukturën e godinës.
Sipas policisë, ai hyri nga çatia, depërtoi në dyqan përmes një korridori teknik dhe zbrazi vitrinat në vetëm katër minuta. Mungesa e energjisë kishte çaktivizuar alarmet dhe bravat elektronike, duke i lehtësuar punën. Plaçkën e futi në një çantë shpine dhe u largua në këmbë. Të nesërmen shkoi në Rumani, ku braktisi makinën e blerë paraprakisht për t’i humbur gjurmët.
Makina e lënë në Rumani dhe hyrje-daljet e tij në vend gjatë muajve të mëvonshëm qenë kyçe për identifikimin. Pas një bashkëpunimi mes autoriteteve spanjolle, rumune dhe shqiptare, ai u lokalizua në Madrid dhe u arrestua nga agjentë civilë. Ndaj tij është dhënë masa e paraburgimit në burgun Soto del Real.
Shamir Hoxha njihet prej vitesh nga policitë e disa vendeve europiane. Ai dyshohet për grabitje bankash, trafik bizhuterish dhe mashtrime ekonomike. Në media është përmendur si “grabitësi metodik” që nuk përdor armë dhe shfrytëzon boshllëqet teknike të sistemeve të sigurisë. Madje në disa raste ka hapur kasaforta me mjete të thjeshta, si stetoskop, dhe ka lënë mesazhe ironike në vendngjarje.
