Gazetarja Anila Hoxha ka komentuar masat e marra një ditë më parë ndaj zv/kryeministres Belinda Balluku: pezullimin nga detyra dhe bllokimin e pasaportës.
Sipas gazetares, kur Balluku po mbante fjalën në kuvend në seancën e 19 nëntorit, SPAK e kishte dhënë verdiktin dhe se masat ndaj saj u aprovuan që prej ditës së djeshme.
Gazetarja tha se SPAK po heton përtej dy tenderave për të cilët akuzohet Balluku. Ajo tha se po kryhen hetime edhe për aeroportin e Vlorës dhe disa transaksione, ndërsa shtoi se hetimet po drejtohen edhe drejt dyshimeve për një skemë të pastrimit të parave.
“Kur fliste në parlament, SPAK e kishte dhënë verdikitn e tij. Masat u aprovuan pasditen e djeshme. Janë masa të bëra publike prej orësh. Për zonjën Balluku janë dy masa që e pezullojnë nga të dyja detyrat. Masa e dytë është masë që e ndalon të largohen nga vendi.
Gjatë kësaj vjeshte, veprimet ishin të kuptueshme për ata që ishin në hetim dhe drejt të cilëve SPAK po shkonte. Janë një sërë proces-verbalesh. Historia nis me dy kallëzime të politikës që qëndrojne prej muajsh me veprime paraprake.
Të dhënat u gjeneruan nga telefoni i Berberi, që flasin për të gjithë procedurën. Kushdo në ministri, kur e kupton që vijnë shkresa apo kontrolle të behta, i ka indiciet që diçka po ndodh. Këto shkresa i kanë shkuar gjatë muajve të fundit dhe kanë kulmuar më 31 tetor ku iu komunikua akuza, ku iu vendosën në dispozicion aktet. Qartazi, kuptohet që SPAK është duke kryer edhe veprime të tjera. Edhe për aeroportin e Vlorës dhe disa transaksione. Nga mënyra si po i përkon shkresat, më duket sikur po shkon drejt hedhjes së dyshimeve për një skemë të pastrimit të parave”,- tha Hoxha në Top Story.
