Gazetari Basir Çollaku, i ftuar në News24, komentoi vendimin e SPAK për të marrë si të pandehur zv/kryeministren Belinda Balluku, duke vënë në dukje shqetësime lidhur me ndikimin e saj në hetim dhe rolin e saj brenda qeverisë.
Çollaku tha se Balluku ka qenë e përfshirë në tendera që pritet të publikohen së shpejti, dhe se lidhja e saj me kryeministrin Rama mund të pengojë shkarkimin e saj.
Ai shtoi se prokuroria e posaçme planifikon që në javët në vijim të kërkojë nga gjykata largimin e Ballukut nga detyra për të parandaluar prishjen e provave, intimidimin e dëshmitarëve dhe ndikimin në procedurat hetimore.
“Balluku është e pandehur, dhe besoj se marrëdhënia e saj me kryeministrin Rama e pengon shkarkimin e saj. Por prokuroria e posaçme, në javët në vijim, do të kërkojë nga gjykata që Balluku të lirohet nga detyra,” tha ai.
Gazetari nënvizoi gjithashtu se SPAK ka sekuestruar një pjesë të dokumenteve dhe provave, dhe se Balluku, si dëshmitare zyrtare dhe firmëtare e vendimeve qeveritare pas marrjes së saj si e pandehur, mund të ketë ndikim të drejtpërdrejtë në hetimin ndaj kryeministrit.
“Kur firmos një veprim penal me porosi të kryeministrit, a është bashkëpunëtor porositësi? Natyrisht që po,” u shpreh gazetari.
