Drejtuesi Agjencisë së Mbikëqyrjes Policore (AMP) Eduart Merkaj raportoi këtë të hënë në komisionin për Çështjet e Brendshme dhe të Mbrojtjes.
Merkaj u pyet nga deputetët e opozitës lidhur me ngjarjen e rëndë të ndodhur 5 ditë më parë në Rinas ku u vra në një atentat mafioz Gilmando Dani dhe shoqëruesi i tij Mustafa Sheqeri, agjent i AMP.
Merkaj tha se situata është sensitive dhe kanë marrë të gjitha masat e nevojshme.
“Situata e Rinasit sensitive dhe e rëndë. Kemi bërë disa prononcime ku janë bërë publike të gjitha masat e marra. Në Prokurorinë e Tiranës është bërë kallëzim penal për procesin e rekrutimit dhe vijueshmërisë në punë. Sot janë marrë masa për hetim disiplinor ku konstatohet për një përjashtim nga AMP dhe vërejtje të tjera.
Drejtori i përgjithshëm i AMP ka për detyrë të kontrollojë edhe vetë punonjësit e AMP, kam patur komunikim me të gjitha agjencitë ligjzbatuese që para se të ndodhte ngjarja, presim përgjigje nga institucionet e tjera”, tha Merkaj.
