Kryeministri Edi Rama ka treguar edhe sot një standard të dyfishtë lidhur me qasjen që ka ndaj rastit të kryebashkiakut Erion Veliaj i cili ndodhet në qeli.
Dy ditë më parë në një emision televiziv, Rama u shpreh se ndjente keqardhje për Veliajn dhe se ky i fundit duhet të kthehej në krye të Bashkisë.
“Raporti im njerëzor me Veliajn është më i fortë se ç’ka qenë nga ana ime. Dhe kur them nga ana ime e theksoj sepse nuk është një raport që ka komunikim për shkak të pozicionit ku ndodhet ai. Nga ana njerëzore përveçse ç’ka qenë më parë është shtuar edhe një keqardhje e thellë për atë që po jeton. Nuk po shtoj asgjë më shumë”,- është shprehur Rama.
Ndërkohë që ditën e sotme gjatë prezantimit të Buxhetit 2026, Rama ka deklaruar se nuk ka përse ti vijë keq dhe se vetë ai do të kujdeset për Tiranën bashkë me Ogerta Manastirliun.
“Duhet të ishte kryetari i Bashkisë që të fliste për buxhetin. Ju e dini situatën. Është një situatë për të ardhur keq, por ka shumë gjëra për të ardhur keq dhe përfundimisht nuk ka ç’na vjen keq dhe duhet të shohim përpara. Tirana ka nevojë për ne. Jemi këtu me Ogertën sepse mbetet kandidatja jonë për të drejtuar Tiranën kur të vijnë zgjedhjet”,- tha Rama.
Pra Rama vijon lojën me Gjykatën Kushtetuese, ku në një krah u bën thirrje të lirojnë Veliajn dhe nga krahu tjetër deklaron se vetë ai do të jetë kryetar ‘de facto’ i Bashkisë.
