Policia ka zbuluar në Selitë një ambient të përshtatur si call center, ku mashtroheshin shtetas të huaj për investime në bursa fiktive.
Gjatë operacionit u kapën në flagrancë 5 persona, prej të cilëve u arrestuan menaxheri dhe dy punonjës, ndërsa dy punonjëse u proceduan penalisht.
Në pranga përfunduan menaxheri K. S., 25 vjeç, si dhe punonjësit F. K., 24 vjeç dhe E. A., 25 vjeç. Ndërsa ndaj shtetaseve E. Sh., 22 vjeçe dhe E. Z., 19 vjeçe, nisi procedimi penal. Në kërkim janë shpallur E. S., 34 vjeç, dhe A. K., 35 vjeç, të dyshuar si organizatorë të aktivitetit.
Në vendngjarje u sekuestruan pajisje kompjuterike, celularë dhe prova të tjera materiale.
“Gjatë operacionit policor të koduar “Wrong call”, shërbimet e Policisë kanë ndërhyrë në një ambient në Selitë, që ishte përshtatur si call center. Në këtë ambient, janë kapur në flagrancë shtetasi K. S., i dyshuar si menaxher i kësaj veprimtarie, dhe 4 punonjës, të cilët mashtronin shtetas të huaj, për të investuar në bursa fiktive. Nga hetimet dyshohet se ambienti ishte marrë me qira nga shtetasit E. S. dhe A. K. me qëllim për ta përdorur për këtë veprimtari të kundërligjshme”, njofton policia.
