Një vit pas lirimit nga burgu, 47-vjeçari Gilmando Dani është ekzekutuar këtë pasdite (11 nëntor) në dalje të aeroportit të Rinasit vetëm pak metra larg komisariatit të Policisë.
Në atentat ka mbetur i plagosur rëndë edhe Muçi Shaljani, 40 vjeç, punonjës i Agjencisë së Mbikëqyrjes Policore (AMP), institucioni që mbikëqyr vetë forcat e rendit.
Dinamika e ngjarjes sipas kamerave të sigurisë
Gilmando Dani dhe Muçi Shaljani sapo ishin kthyer nga një udhëtim në Barcelonë ku kishin fluturuar prej datën 7 nëntor të këtij viti. Pas zbritjes në Rinas ata kanë marrë nga parkimi mjetin tip “Mercedes Benz“ (në pronësi të Elvis Kosovës) dhe sapo janë afruar pranë rrethrrotullimit të Rinasit, të shtëna me armë kanë nisur drejt tyre nga një mjet tjetër tip “Toyota“ blu e errët.
Menjëherë pas të shtënave, një person zbret nga dera e mjetit tip Toyota, i afrohet Benzit, hap derën e pasagjerit dhe qëllon disa herë me armë zjarri duke lënë të vdekur Danin dhe të plagosur rëndë Shaljanin.
Dyshohet se, Gilmando Dani dhe Muçi Shaljani (Sheqeri) në nisje të të shtënave i janë kundërpërgjigjur autorit të vrasjes me armë por pavarësisht kësaj ky i fundit ka arritur të largohet.
I maskuar dhe me një veshje që ngjante me uniformë policie, ai hipën në mjetin tip Toyota, i cili menjëherë merr rrugën drejt Fushë-Krujës, duke ndjekur rrugën Vorë-Fushë-Krujë.
Pak minuta më vonë mjeti është gjetur i djegur në fshatin Halilaj nga forcat e policisë dhe zjarrfikësit ku janë gjetur 4 armë zjarri e kallashnikovë, ndërsa ka dyshime se kanë qënë 4 bashkëpunëtorë.
Dështimi i Policisë së Shtetit
Ngjarja ka ndodhur në një zonë me prani të lartë policore, ku patrullat e rendit, të trafikut dhe forcat e sigurisë së aeroportit janë të përhershme. Pavarësisht kësaj, autorët kanë mundur të ekzekutojnë atentatin dhe të largohen, duke ngritur edhe njëherë pikëpyetje serioze mbi efikasitetin e strukturave të sigurisë dhe nivelin e kontrollit shtetëror në zonat më të mbrojtura të vendit.
Fakti që Dani udhëtonte në automjet me Shaljanin, punonjës i AMP-së nxit debate të forta mbi marrëdhëniet mes botës së krimit dhe strukturave të policisë, si dhe mbi rrezikun e infiltrimeve të mundshme brenda institucioneve ligjzbatuese.
Ironikisht, ngjarja ndodhi vetëm disa orë pasi Ministrja e Brendshme, Albana Koçiu, deklaroi publikisht se “Shqipëria është ndër vendet më të sigurta të rajonit”. Por atentati në mes të ditës, në një nga zonat më të mbrojtura të Tiranës, e vë në pikëpyetje këtë imazh të sigurisë që ministrja përpiqet të përcjellë.
Sakaq lidhur me rastin bëhet me dije se janë ngritur postblloqe në akset hyrëse dhe dalëse të kryeqytetit, ndërsa hetimet janë në fazën e parë. Gjithashtu janë sekuestruar pamjet e kamerave të sigurisë të aeroportit dhe të bizneseve përreth.
LEXO EDHE:
Atentat tek rrethrrotullimi i Rinasit, viktimë krahu i djathtë i Emiljano Shullazit/ DETAJE – PAMJE
