Sipas mediave izraelite, Shtetet e Bashkuara po planifikojnë të krijojnë një bazë të madhe ushtarake në Izrael, afër kufirit me Rripin e Gazës, e cila do të shërbejë për forcat ndërkombëtare që pritet të veprojnë në zonë për të ruajtur armëpushimin. Lajmi është publikuar nga media izraelite.
Burimet izraelite bëjnë të ditur se baza mund të strehojë disa mijëra trupa, ndërsa kostoja e saj vlerësohet rreth 500 milionë dollarë. Sipas raportimeve, javët e fundit zyrtarët amerikanë kanë zhvilluar bisedime me qeverinë izraelite dhe ushtrinë (IDF) për të përcaktuar vendndodhjen e mundshme të bazës.
Një funksionar i sigurisë ka deklaruar për mediat se ky hap përbën një ndryshim të madh për Izraelin, që tradicionalisht ka shmangur përfshirjen ndërkombëtare në territoret nën kontrollin e tij, dhe tregon vendosmërinë e Uashingtonit për të luajtur një rol aktiv në Gaza dhe në konfliktin izraelito-palestinez.
Aktualisht, SHBA-të kanë ngritur tashmë një qendër monitorimi civil dhe ushtarak në Kiryat Gat, në jug të Izraelit, për të mbikëqyrur respektimin e armëpushimit dhe hyrjen e ndihmave humanitare në Rripin e Gazës.
