Gazetari Nertian Sejmani ka komentuar një video të publikuar nga kryeministri Edi Rama në rrjetet sociale, duke akuzuar manipulim të reagimit të ambasadorit kroat në Tiranë.
Sipas Sejmanit, një tundje koke e ambasadorit, gjatë ceremonisë së dorëzimit të progres-raportit për Shqipërinë dy ditë më parë, është paraqitur në mënyrë të pasaktë.
Në videon e publikuar nga Rama duket sikur ambasadori po pajtohet me fjalët e kryeministrit, ku Rama thotë se “edhe ata që nuk e duan Shqipërinë sot duhet të ndihen mirë, sepse raporti tregon që Shqipëria është afër BE-së dhe do të përfitojnë edhe ata që nuk e duan qeverinë”.
Por, sipas gazetarit, ambasadori kroat e ka tundur kokën në një moment tjetër, kur flet ambasadori i BE-së, i cili thekson se “Shqipëria duhet të plotësojë më parë objektivat ndërmjetëse, si një hap i gjatë në rrugën e mbylljes së negociatave”.
