Pas takimit në Shtëpinë e Bardhë me presidentin amerikan Donald Trump, kryeministri hungarez Viktor Orbán njoftoi se Hungaria ka marrë një përjashtim njëvjeçar nga sanksionet ndaj naftës dhe gazit rus. Marrëveshja shihet si një fitore për të dyja palët: për Orbánin, që shmang goditjen ekonomike, dhe për Trumpin, që siguron angazhime të reja nga Budapesti në fushën e energjisë dhe mbrojtjes.
Në këmbim të përjashtimit, Hungaria do të blejë nga Shtetet e Bashkuara karburant bërthamor dhe armë me një vlerë totale prej rreth 700 milionë dollarësh, ndërsa palët po negociojnë edhe për furnizimin me gaz natyror të lëngshëm dhe ndërtimin e mini-reaktorëve modularë.
Gjatë takimit në “Cabinet Room”, Trump e lavdëroi publikisht Orbánin, duke e quajtur “një lider të fortë” dhe duke e vlerësuar për qëndrimet e tij ndaj emigracionit. Ai kritikoi vendet evropiane që, ndonëse kanë dalje në det, vazhdojnë të blejnë energji nga Rusia, ndërsa Hungaria, sipas tij, përballet me vështirësi më të mëdha për furnizime alternative.
Sipas të dhënave të FMN-së për vitin 2024, Hungaria varet nga Rusia për 74% të gazit dhe 86% të naftës që konsumon. Pa përjashtimin amerikan, Budapesti rrezikonte sanksione të rënda dytësore, në një kohë kur Orbán kërkon rizgjedhjen në prill.
Në Uashington, Orbán kritikoi ashpër Bashkimin Evropian për sanksionet që i ka vendosur Hungarisë në lidhje me politikat e emigracionit, duke theksuar se qeveria e tij “është e vetmja në Europë që mbron vlerat e krishtera”, ndërsa të tjerat i cilësoi si “liberale të majta”.
Gjatë diskutimeve u përmend edhe çështja e Ukrainës. Orbán deklaroi se “fitimi i luftës nga Kievi do të ishte një mrekulli”, ndërsa Trump e akuzoi administratën Biden për shtyrjen e Europës drejt vazhdimit të konfliktit.
Burime pranë delegacionit hungarez thanë se Trump ka ringjallur idenë e një samiti me presidentin rus Vladimir Putin, që mund të mbahet gjatë vitit të ardhshëm. /Corriere Della Sera/
