Një 28-vjeçar është arrestuar në flagrancë nga Policia e Lezhës, pasi dyshohet se po shpërndante lëndë narkotike në qytet.
Gjatë kontrollit të automjetit dhe kontrollit fizik ndaj shtetasit D. Sh., shërbimet e Policisë kanë gjetur doza të lëndës së dyshuar narkotike kanabis.
Po ashtu, është sekuestruar një grirëse për përgatitjen e lëndëve narkotike.
Nga verifikimet e mëtejshme rezultoi se 28-vjeçari po drejtonte automjetin në mënyrë të parregullt, pasi i ishte pezulluar leja e drejtimit.
Automjeti, lënda narkotike dhe pajisjet e sekuestruara janë marrë në cilësinë e provës materiale.
