Kryedemokrati Sali Berisha ka ngritur akuza të forta ndaj qeverisë, duke deklaruar se tuneli i Llogarasë është ndërtuar pa leje ndërtimi dhe se dokumenti përkatës është firmosur vetëm në maj të vitit 2025. Sipas Berishës, kryeministri Edi Rama jo vetëm ka firmosur për këtë projekt, por edhe ka shtuar fondin me 150 milionë lekë për studimin e fizibilitetit, fonde që janë marrë nga rezerva e Këshillit të Ministrave.
Berisha thotë se pas kthimit nga Turqia dhe anulimit të parë të tenderit, qeveria e shpalli sërish procedurën më 24 qershor 2021, ndërsa afati i dorëzimit të dokumenteve përfundonte më 28 korrik të po atij viti. Berisha shtoi se leja e zhvillimit ishte firmosur që më 13 korrik 2021, pra 14 ditë përpara se të shpallej fituesi i tenderit, duke e cilësuar të gjithë procesin si të paracaktuar dhe të rakorduar.
“Edi Rama, jo vetëm ka firmosur, por ka shtuar fondin me 150 milionë lekë për studimin e fizibilitetit të tunelit të Llogarasë. Shtesë që e ka marrë nga fondi rezervë i Këshillit të Ministrave. Pas kthimit nga Turqia dhe pasi anulimit të tenderit, shpallën tenderin përsëri me datën 24 qershor 2021. Me 3 qershor ishin në Ankara. Fundi i dorëzimit të dokumenteve ishte data 28.7.2021. Leja e zhvillimit është firmosur pa u firmosur fituesi i tenderit, 14 ditë përpara.
Gjithçka e paracaktuar. Gjithçka e rakorduar. Leja e zhvillimit është firmosur që me datën 13.7.2021. Leja e ndërtimit, kjoështë famozja Adelajda Roka, është firmosur me 28.5.2025. Shikoni një kryeministër që shkon në Theth dhe i prish shtëpinë e ndërtuar në tokën e tij tjetrit, pse e ke ndërtuar pa leje, ndërkohë ndërton objektin 220 milionë euro pa leje dhe firmos lejen e ndërtimit me 28.5.2025.
A mund ta imagjinoni ju? Ky është narkoshtet ku ligjet dhe Kushtetuta nuk kanë asnjë vlerë. Tani më thoni ju mua, lejen e ndërtimit e ka Lubia apo e ka Edi Rama? Kush i ka lejet e ndërtimit. Nuk jam këtu për t’i bërë asnjë lloj avokatie, se ju e dini qëndrimin tim ndaj saj, por ajo është një Rahmetlie tani. Hajduti i vërtetë i kësaj afere, i aeroportit të Vlorës dhe të tjera që do shohim, është Edi Rama, Edi Rama, Edi Rama.”
