Shtetet e Bashkuara nuk kanë në plan të kryejnë shpërthime bërthamore, deklaroi ministri amerikan i Energjisë, Chris Wright, duke qetësuar shqetësimet që lindën pas thirrjes së presidentit Donald Trump për ushtrinë që “të rifillojë testet e armëve bërthamore”.
“Nuk bëhet fjalë për shpërthime bërthamore,” tha Wright për rrjetin Fox News, duke sqaruar se “janë teste jo kritike, që nuk përfshijnë sasinë e nevojshme të materialit për të shkaktuar një shpërthim bërthamor”.
Deklaratat vijnë pak ditë pas postimit të Trump në Truth Social, ku ai tha se kishte urdhëruar zyrtarët e mbrojtjes “të fillojnë testimet e armëve tona bërthamore në të njëjtin nivel me fuqitë kundërshtare”.
Wright shtoi se banorët afër zonave të testimeve, si në Nevada, nuk kanë arsye për shqetësim, pasi “testet po verifikojnë pjesët teknike të armëve për të garantuar sigurinë e tyre, jo për të shkaktuar shpërthime bërthamore.”
Deklaratat e Trump javën e kaluar u interpretuan nga shumë analistë si sinjal për rifillimin e testimeve bërthamore, të cilat SHBA i ndaluan që prej vitit 1992.
Në intervista të mëvonshme, Trump tha se “Rusia dhe Kina po kryejnë teste, por nuk flasin për to”. Sipas të dhënave ndërkombëtare, Rusia ndaloi testet bërthamore në vitin 1990, ndërsa Kina në vitin 1996.
Korea e Veriut mbetet e vetmja shtet që ka kryer teste bërthamore pas viteve ’90, megjithëse edhe Pheniani shpalli moratorium në vitin 2018.
