Deputetja e Partisë Demokratike dhe nënkryetare e Komisionit të Përbashkët Parlamentar të Stabilizim-Asociimit, Jorida Tabaku, theksoi se procesi i integrimit të Shqipërisë në Bashkimin Europian nuk mund të matet me statistika apo prezantime propagandistike, por kërkon reforma të thella, transparencë dhe llogaridhënie.
“Integrimi nuk është statistikë, por ndryshim i ndershëm dhe reforma reale,” – deklaroi Tabaku, duke shtuar se sot ky proces është kthyer në një procedurë të mbyllur, ku as deputetët, as shoqëria civile, as bizneset nuk marrin pjesë në dialog.
Ajo kritikoi mënyrën se si mazhoranca ka ndryshuar strukturën e komisioneve parlamentare, duke e cilësuar këtë si një “regres institucional që prek zemrën e demokracisë parlamentare”.
Një tjetër pikë e rëndësishme ishte liria e medias, që sipas Tabakut, është kusht i panegociueshëm për hapjen e kapitujve me BE-në. “Asnjë vend që nuk ka liri medie nuk mund të flasë për integrim europian,” tha ajo, duke iu referuar raporteve ndërkombëtare për përqendrim informacioni dhe presione ndaj gazetarëve.
