Kreu i Partisë Demokratike, Sali Berisha, gjatë fjalës së tij në Kuvend denoncoi, nga pozicioni i opozitës, mungesën e rezultateve konkrete nga hetimet për çështjet e CEZ-it dhe inceneratorëve, ku sipas tij janë humbur shuma të mëdha parash publike.
Ai theksoi se qytetarët paguajnë pasojat e një sistemi të kapur nga korrupsioni, ndërsa drejtësia nuk e ndjek në mënyrë efektive përgjegjësinë penale të personave të përfshirë.
Berisha e kritikoi Altin Dumanin, duke e paraqitur si mbrojtës të këtyre kontratave dhe shpenzimeve që nuk janë verifikuar, duke theksuar se hetimet e SPAK janë ende në fazën paraprake për shumë prej çështjeve të përmendura, përfshirë djegësin e Tiranës dhe koncesionet e inceneratorëve.
Ai argumentoi se, sipas llogarive të tij, shumat e humbura nga këto procese arrijnë deri në 1 miliard euro, duke theksuar nevojën për përgjegjësi reale dhe transparencë në menaxhimin e fondeve publike.
“Të dashur qytetarë dhe qytetare, ishte një rast unik në jetën tuaj për të gjithë ata, në jetën e tyre që ndoqën këtë seancë se si panë grupin e mëkatarëve të strukur, të përulur gjer në dhe. Se si e panë avokatinë e shpifur që iu bë këtu një sistemi, i cili po penalizon më shumë se cilindo tjetër, qytetarin e thjeshtë. Ju, avoketërit e Dumanit, të kapurit peng të Edi Ramës, nuk duhet të harroni këtu se për qytetarët shqiptarë që vetëm me CEZ-in kanë humbur 630 milionë euro, fatura të certifikuara nga kompani ndërkombëtare, për shkak të pazarit që Edi Rama ka bërë me kompaninë CEZ, ndërkohë që arbitri ndërkombëtar i shkruante letër dhe i thoshte zoti kryeministër mos bëj marrëveshje sepse qeveria shqiptare është në pozitën e fituesit.
Por këto i mbulon Dumani dhe dumanërit. Ai që e pëson nga ky qëndrimi i tij dhe i tyre është qytetari shqiptar, i cili pagoi sa qimet e kokës 400 milionë euro për inceneratorët që nuk kanë as nam as nishan sot. Dhe ai thotë se kam hetim paraprak pas kaq vitesh. Po nuk mund të bëhet më i shpifur. Po çfarë hetimi paraprak mo? Janë 400 milionë euro që nuk ekzistojnë. Janë 140 milionë për djegësin e Tiranës, që nuk ka as gjurmë, që i kanë paguar njerëzit e varfër, dhe ai thotë po vazhdojmë hetim paraprak. Një mashtrues ordiner që del këtu dhe përpiqet të mbrojë nga flakët e djegësve Edi Ramën, kryeartikektin e tyre.
A e dini ju o qytetarë se kush është dënuar për djegësin e Tiranës? Është dënuar Arben Ahmetaj që e ka kundërshtuar 5 herë me shkrim. Dhe u dënua sepse u gjetën pllakat e banjos. Domethënë 140 milionë euro kushtonin sa pllakat e banjos të ish-bashkëshortes së Arben Ahmetajt. A e dini o qytetarë se të marra së bashku këto bëjnë 1 miliard euro? Se të marra së bashku bëjnë dyfishim pensionesh? Se të marra së bashku bëjnë dyfishim rrogash. Nuk i ka vjedhur Altin Dumani këto, por Altin Dumani është bërë avokat i vjedhjeve më të mëdha në historinë e këtij vendi,” tha Berisha.
