Eugen Beçi, avokat dhe ish-prokuror i Krimeve të Rënda, duke komentuar në emisionin “Të Paekspozuarit” arrestimin e avokatit Ulian Bajrami në gjykatën e Elbasanit, u shpreh se në raste se ky nuk vendos as prokurori dhe as polici, por gjyqtari nëse konstatohet vepër penale në sallën e gjyqit.
Beçi deklaroi se vetëm gjyqtari duhet të urdhëronte dhe të thoshte, ka ndodhur vepër penale dhe ta referonte atë.
“Prokurori, kur kalon derën e sallës së gjykatës është si palë e zakonshme me avokatin. Gjykata duhet të mbajë ekuilibrat. Prokurori pavarësisht se ç’ka bërë deri në mbërritjen e çështjes për gjykim, aty bëhet i barabartë me avokatin. Debati gjyqësor i vërtetë bëhet në sallën e gjyqit. Gjyqtari është personi që vendos për rendin, qetësinë dhe gjithçka ndodh në sallën e gjyqit. Mendoj se këtu nuk është prokurori që mund të ketë bërë këllëzim, por është gjykata, e cila duhet të ishte më autoritare në vendosjen e rregullit.
Në rast se konstatohet vepër penale në sallën e gjyqit, vendos gjykata dhe jo prokurori apo polici. Në sallën e gjyqit prokurori është i barabartë me palën tjetër. Trupi gjykues nuk mund të perceptojë kërcënim me atë që dëgjuam në audio. Kërcënimi përcaktohet, ose kanosja, është vepër penale, që duhet të jetë e aty për atyshme, serioze, dhe të krijon përshtypje se do të kryhet për të shkatërruar jetën apo pronën.
Në sallën e gjyqit Zot për ekzistencën e veprës penale është gjyqtari. Është ai që duhet të urdhëronte dhe të thoshte, ka ndodhur vepër penale dhe e referon. Madje, me gjyqtarë me shumë më tepër integritet, kemi patur situatë që dëshmitari ka bërë dëshmi të rreme, ka qenë e dukshme, dhe ka ndërhyrë gjyqtari ka thënë prokuror nuk mund ta arrestosh në sallë, sepse jam unë Zot në sallën e gjyqit.
Ne momentin që ndodh vepra penale, janë elementë që duhen shpjeguar. Si ka filluar çështja. Si mund të ndalosh një person, e thërret në zyrë dhe i thua ke rrezik të ikësh dhe të ndaloj me iniciativë.
Gazetarët thonë arrestim, por ka ndodhur ndalim me iniciativë nga policia dhe ai ndodh në një rast, kur ka rrezik serioz që personi të largohet. E para ke të paqartë veprën penale dhe e dyta ndalon me iniciativë një person.
Në rastin që lirohet personi, përse vijon vepra penale? Është qesharake të regjistrohet “goditje e gjyqtarit”, po ku ka ndodhur kjo? Prokurorët, decentralizimi i plotë i prokurorisë sjell këtë”– tha Beçi.
