Policia e Shkodrës ka vijuar hetimet për zbardhjen e ngjarjes së ndodhur një ditë më parë në fshatin Trush, ku tre shtetas, babai së bashku me dy djemtë e tij dyshohet se qëlluan me armë zjarri dhe armë gjahu në ajër për të kanosur fqinjin e tyre, shtetasin P. N., për motive të dobëta.
Gjatë kontrollit të ushtruar në territorin në pronësi të njërit prej të dyshuarve, është bërë e mundur gjetja dhe sekuestrimi i një pistolete, e cila dyshohet se është përdorur gjatë konfliktit. Arma ishte fshehur pranë banesës së autorëve të dyshuar dhe u shoqërua me një sasi municioni luftarak.
Arma e sekuestruar do t’i nënshtrohet ekspertizës balistike në Institutin e Policisë Shkencore, për të verifikuar nëse është përdorur në ndonjë ngjarje tjetër kriminale.
Kujtojmë se dje në kuadër të hetimeve për këtë ngjarje, u sekuestruan dy armë gjahu dhe u arrestuan shtetasit Ç. M. dhe D. M. (babë e bir), ndërsa djali tjetër i familjes, shtetasi E. M., është shpallur në kërkim.
