Deputetja e PD-së, Jorida Tabaku, ka reaguar ndaj njoftimit të fundit të qeverisë për rritjen e pensioneve, duke e cilësuar si një “mashtrim të radhës” që nuk përmirëson jetesën e pensionistëve shqiptarë.
“Nuk është rritje, është tallje,” tha Tabaku, duke theksuar se shtesa prej vetëm 15 lekësh në ditë nuk mjafton as për një kafe në mëngjes.
Ajo akuzoi socialistët se në 12 vite pushtet kanë trajtuar pensionistët me premtime boshe dhe propagandë, ndërsa realiteti është një: “Pensionistët janë më të varfër se kurrë.”
Sipas saj, të dhënat nga Instituti i Vjenës për Studime Ndërkombëtare tregojnë se pensionet shqiptare përbëjnë vetëm 8% të mesatares së Bashkimit Europian. “Flasin për integrimin në BE në 2030, ndërsa pensionistët tanë jetojnë me pensione që s’janë as 1/10 e Europës,” u shpreh Tabaku.
Tabaku vuri në dukje se çmimet janë rritur me mbi 60% në dekadën e fundit, duke e bërë të pamundur për pensionistët të përballojnë nevojat bazë si ushqimi, ilaçet dhe shërbimet. “Në një vend ku 1 në 3 qytetarë është mbi 60 vjeç, kjo nuk është thjesht statistikë — është varfëri e institucionalizuar,” përfundoi ajo.
