Administrata Trump ka revokuar vizat e të paktën gjashtë shtetasve të huaj, për komentet që kanë bërë në rrjetet sociale në lidhje me vrasjen e aktivistit të djathtë, Charlie Kirk.
Në një postim në platformën X, Departamenti i Shtetit tha se SHBA-të nuk mirëpresin të huaj, që urojnë vdekje të amerikanëve. “Shtetet e Bashkuara nuk kanë detyrim të strehojnë të huaj, që urojnë vdekjen e amerikanëve”.
Postimi i DASH përfshin pamje të gjashtë komenteve në rrjete sociale, ku disa persona shfaqnin gëzim për vdekjen e Kirk në muajin shtator. Departamenti i Shtetit shtoi se priten edhe anulime të tjera vizash.
Charlie Kirk, një aleat i ngushtë i presidentit Donald Trump, u vra me armë më 10 shtator gjatë një aktiviteti në Universitetin e Utah-ut. Ai ishte 31 vjeç dhe i njohur si udhëheqës i organizatës konservatore “Turning Point USA”, që synonte mobilizimin e të rinjve republikanë.
Kirk shpesh ishte në qendër të polemikave për deklaratat e tij mbi racën, krimin dhe liritë civile, të cilat u cilësuan nga kritikët si “raciste dhe nxitëse të urrejtjes”.
Sipas Departamentit të Shtetit, personave që iu revokua viza, ishin nga Argjentina, Afrika e Jugut, Meksika, Brazili, Gjermania dhe Paraguaji.
Njëri prej tyre, shtetasi jug-afrikan Nhlamulo Baloyi, konfirmoi për mediat si “Reuters” dhe “Washington Post” se viza e tij e biznesit ishte revokuar, pasi kishte shkruar një nga postimet, e përfshira në listë.
Revokimi i vizave u shpall të njëjtën ditë kur presidenti Trump i ndau Charlie Kirk pas vdekjes, “Medaljen Presidenciale të Lirisë”. Trump e cilësoi atë si një dëshmor dhe fajësoi radikalët e majtë, për vrasjen.
I dyshuari për vrasjen, 22-vjeçari Tyler Robinson, u arrestua dy ditë pas ngjarjes dhe është akuzuar për vrasje të rëndë.
Aadministrata Trump ka zgjeruar kontrollin e rrjeteve sociale gjatë procesit të aplikimit për vizë dhe ka anuluar mijëra viza studentore, si pjesë e një fushate më të gjerë të ashpërsimit të kushteve të imigracionit.
Departamenti i Shtetit deklaroi se mbi 6,000 viza studentore janë revokuar këtë vit, shumica për shkelje si dhunë fizike, ecje me makinë në gjendje të dehur, vjedhje dhe “mbështetje për terrorizmin”.
Megjithatë, nuk është sqaruar se çfarë nënkuptohet me “mbështetje për terrorizmin”, ndonëse administrata Trump, dyshohet se ka shënjestruar edhe studentë, që kanë protestuar në mbështetje të Palestinës.
/Burimi: BBC
