Presidenti i Republikës, Bajram Begaj, ka reaguar pas nisjes së procedurës parlamentare për shkarkimin e tij nga Partia Demokratike, duke i cilësuar pretendimet e opozitës si “të pavërteta”.
Në reagimin zyrtar, presidenca thekson se nuk komenton nismat politike, duke argumentuar se neutraliteti i funksionit presidencial e pengon të marrë pozicione mbi sulmet e opozitës.
“Procedura për shkarkimin e Presidentit të Republikës nga detyra është instrument kushtetues i Parlamentit. Parlamenti është i lirë dhe sovran ta ushtrojë sa herë që e gjykon të përligjur. Presidenti i Republikës ndjehet i obliguar t’i përgjigjet parlamentit me gjithë seriozitetin dhe ndershmërinë që imponon kjo procedurë. Grupi parlamentar i Partisë Demokratike ka promovuar sot nismën e tij duke publikuar pretendime rreth fakteve që nuk janë të vërteta. Presidenti i Republikës pret që Parlamenti të hetojë rreth tyre me profesionalizëm dhe transparencë të plotë. Kjo nuk duhet bërë si obligim ndaj postit të lartë të Kreut të Shtetit por si detyrim ndaj të vërtetës dhe interesit të publikut”.
Kreu i grupit parlamentar të PD, Gazment Bardhi, deklaroi sot se Begaj vazhdon të punojë si mjek në një klinikë private, ndërkohë që ushtron detyrën e Presidentit, dhe se djali i tij është i punësuar në një kompani që ka fituar tendera nga Presidenca.
“Do e kallëzojmë në SPAK”/ Bardhi: Begaj ia dha tenderat e Presidencës kompanisë ku punon i biri
