Shqipëria arriti një fitore historike në ndeshjen e fundit ndaj Serbisë, duke siguruar tre pikë vendimtare drejt kualifikimeve për Botërorin. Ndeshja u zhvillua të shtunën në Leskovc, ku skuadra shqiptare tregoi dominim dhe organizim të mirë në fushë.
Pas humbjes, presidenti i Serbisë, Aleksandër Vuçiç, i hodhi fajin një grupi protestuesish që sipas tij kishin ndikuar negativisht te gjendja e lojtarëve serbë.
Vuçiç deklaroi se dy apo treqind protestues u mblodhën para hotelit ku qëndronte ekipi në Nish, duke krijuar shqetësime të panevojshme dhe duke prishur atmosferën e përgatitjes. Ai i cilësoi ata si “mokasina” dhe i akuzoi për sabotim.
Presidenti serb shtoi se grupi i protestuesve kishte për qëllim të ndikonte te lojtarët dhe të ndërpriste përgatitjet, duke kërkuar nga qytetarët të reflektojnë mbi kontributin e tyre për vendin.
Nga ana tjetër, Shqipëria festoi fitoren e rëndësishme, e cila i jep avantazh skuadrës drejt kualifikimit për Botërorin 2026.
