Bindja e Izraelit dhe Hamasit për miratimin e fazës së parë të planit të SHBA-së për paqen në Gazë është një progres i madh dhe një shans i vërtetë për t’i dhënë fund luftës dhe për të liruar të gjithë pengjet, tha sot shefja e punëve të jashtme të BE-së, Kaja Kallas duke e quajtur atë një arritje të madhe diplomatike, sipas “Euronews”.
“BE-ja do të bëjë çmos për të mbështetur zbatimin e tij”, tha Kallas.
Dje në mbrëmje, Izraeli dhe Hamasi thanë se kishin rënë dakord për një armëpushim të shumëpritur dhe një marrëveshje për lirimin e pengjeve, faza e parë e planit të presidentit të SHBA-së Donald Trump, për t’i dhënë fund një lufte në Gaza – që ka shkaktuar vdekjen e më shumë se 67 000 personave dhe ka riformësuar Lindjen e Mesme.
Zyrtarët më të lartë të Bashkimit Evropian, presidentja e Komisionit Evropian Ursula von der Leyen, presidenti i Këshillit Evropian, António Costa dhe presidentja e Parlamentit Evropian, Roberta Metsola kanë mirëpritur gjithashtu, marrëveshjen midis Izraelit dhe organizatës militante palestineze “Hamas” mbi fazën e parë të planit të paqes për t’i dhënë fund luftës në Rripin e Gazës.
