Kryetari i Partisë Demokratike, Sali Berisha, ka reaguar mbylljes së papritur të seancës parlamentare të 9 tetorit, duke e cilësuar si një “asgjësim de facto të Kuvendit”.
Në një deklaratë për mediat jashtë sallës së Kuvendit, Berisha akuzoi kryeministrin Edi Rama dhe ministrat e tij për refuzimin e dhënies së llogarisë lidhur me një takim të dyshimtë në Arubë, ku sipas tij, janë përfshirë kartele droge.
Ai tha se vetëm pas denoncimit të këtij episodi, kryetari i Kuvendit, Lindita Nikolla, vendosi të mbyllë punimet.
Berisha deklaroi:
“Ky është parlament që nuk duhet të ekzistojë asnjë ditë. Ky është Pelesh-parlamenti, unik në historinë e tij. E turpshme. Këta kanë frikë dhe tmerr dhe votojnë me shpejtësi të rrufeshme.”
Ai theksoi se opozita kishte insistuar në një të drejtë kushtetuese për të debatuar dhe kërkuar llogari, por se seanca u ndërpre para kohe, pavarësisht se rregullorja parashikonte 10 orë diskutime.
