Reperi shqiptar Kleviol Ahmeti, i njohur me emrin e artit “Cllevio Serbiano”, pritet të deportohet ditën e nesërme (8 tetor) nga Emiratet e Bashkuara Arabe.
Ai është ndaluar rreth 3 muaj më parë në Dubai, pasi ishte shpallur në kërkim ndërkombëtar nga drejtësia shqiptare. Burime për mediat bëjnë me dije se ka qenë vetë Cllevio, i cili ka nënshkruar vetë për të ardhur në Shqipëri dhe për t’u përballur me akuzat.
Kleviol Ahmeti akuzat si porositës i djegies së automjetit luksoze të personazhit të njohur të ‘TikTok’-ut, Kozak Braçit.
Policia ka arrestuar si autorë të ngjarjes shtetasit D. L., 40 vjeç, dhe M. L., 18 vjeç, të dy nga Vlora, ku sipas autoriteve, ata janë paguar 1500 euro nga Kleviol Ahmeti për t’i vënë zjarrin makinës së Kozak Braçit, në orët e para të 2 Dhjetorit të vitit 2023 në zonën e Alliasit në kryeqytet.
Gjithashtu, ndaj Kleviol Ahmetit ka bërë kallëzim në Polici edhe reperi Rigel Rajku (Noizy), së bashku me babain e tij, Bashkim Rajku, pasi sipas tyre, Cllevio u ka shkaktuar “një gjendje të rëndë ankthi dhe frike të vazhdueshme, me kërcënimet që u ka bërë në rrjetin e tij social Tik-Tok, ku është shprehur se do ta vrasë dhe do ta shkatërrojë” etj.
Kujtojmë se Kleviol Ahmeti rezulton i dënuar për trafik të lëndëve narkotike.
