Ditën e sotme është mbajtur në Prishtinë seanca gjyqësore mbi vrasjen e Liridona Ademaj. Tre të akuzuarit për vrasjen e saj Naim Murseli, Kushtrim Kokalla dhe Granit Plava kanë dalë sot para trupit gjykues. Mediat e Kosovës raportuan se në seancën e sotme ka folur për herë të parë mjeku ligjor, i cili ka kryer autopsinë mbi trupin e viktimës.
Eksperti Naim Uka, ka dëshmuar fakte tronditëse mbi rrethanat e krimit mbi viktimën. Ai deklaroi se autopsia ka treguar se viktima është qëlluar nga distanca 2 deri në 5 centimetra. Uka tha se vrasja e Ademajt mund të ketë ndodhur duke ia mbajtur armën në kokë.
“Gjatë ekzaminimit të plagës hyrëse- përreth vrimës hyrëse kemi konstatuar prezencën e faktorëve plotësues të qitjes, të cilët kanë shkaktuar djegien lëkurore- me prezencë të grimcave të barotit- dhe në bazë të këtyre provave mjekoligjore është konstatuar se distanca e qitjes sillet rreth 2-5 centimetër. Përjashtohet mundësia e vrasjes me puthitje apo gjysmë-puthitje për shkak të mungesës së stampimit të tytës së armës në indet e buta përmes vrimës hyrëse të plagës”– tha Uka.
Sipas tij, si pasojë e kësaj plage ka ardhur edhe gjakderdhja e jashtme dhe e brendshme e cila ka qenë shkaku i vdekjes. Ekperti ka mohuar mundësinë e vetëvrasjes, pasi autopsia ka treguar se mungon forca e shtërngimit në gishtin tregues. Ai shtoi edhe faktin se gjatë ekzaminimit të trupit të Ademajt, krahas plagës së shkaktuar nga plagosja me armë të zjarrit, është vërejtur edhe një mavijosje e dorës së majtë, e cila është krijuar para ose pas vrasjes.
Tre të akuzuarit janë lënë nën masën ë arrestit me burg, ndërkohë që i dyshuari i katërt Tom Dodaj ka pranuar autorësin për veprën penale “importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse.
Liridona Ademaj u vra në makinën më 29 Nëntor 2023, në rrugën “Dalip Alshiqi”. Viktima po shkonte në shtëpi bashkë me bashkëshortin dhe fëmijët. Për vrasjen e saj janë burgosur katër persona, mes tyre edhe i dyshuari kryesor për porositjen e vrasjes së saj, Naim Murseli.
