Ish-drejtuesja e Këshillit të Lartë Gjyqësor, Naureda Llagami, ka dorëzuar sot pranë Gjykatës Administrative të Shkallës së Parë Tiranë kërkesën për pezullimin e vendimit mbi emërimin e anëtarit të ri në Gjykatën Kushtetuese.
Sipas kërkesës së pubikuar nga Syri.net, Llagami kërkon “pezullimin e zbatimit të vendimit të Mbledhjes së Posaçme të gjyqtarëve të Gjykatës së Lartë nr. 2, datë 30.09.2025, si dhe procedurave deri në zgjidhjen përfundimtare të çështjes”. Kërkesa mbështetet në nenet 15, 16, 17, 28, 29 e vijues të Ligjit nr. 49/2012 për gjykatat administrative, e ndryshuar.
Llagami ka ngritur dyshime mbi vendimmarrjen e Gjykatës së Lartë gjatë votimit për përzgjedhjen e anëtarit të ri që do të zëvendësojë Holta Zaçajn. Në mbledhjen e datës 30 shtator, ajo mori 8 vota, Asim Vokshi 6 vota dhe Florian Ballhysa asnjë votë, ndërsa një votë u shpall e pavlefshme.
Ish-drejtuesja e KLGJ pretendon se vota e shpallur e pavlefshme i përkiste asaj, duke e çuar numrin e votave në 9, që do të ishte 3/5 e totalit të nevojshëm për të fituar mandatin.
Sipas saj, kjo votë u shpall e pavlefshme qëllimisht, dhe nëse do të ishte pranuar, ajo do të ishte zgjedhur si anëtare e re e Kushtetueses, jo Asim Vokshi, i cili u emërua më pas për shkak të renditjes në pikëzimin e Këshillit të Emërimeve në Drejtësi.
Llagami ka kërkuar gjithashtu dosjen e plotë të mbledhjes, përfshirë regjistrimet audio dhe procesverbalet, për të verifikuar të gjitha procedurat e votimit.
LEXO EDHE:
