Presidenti i Shteteve të Bashkuara, Donald Trump, i ka dhënë Hamasit një afat të prerë për të pranuar planin e paqes të hartuar nga SHBA për Gazën, marrëveshje kjo e dakordësuar mes tij dhe kryeministrit izraelit, Benjamin Netanyahu.
Në një postim në platformën e tij Truth Social, Trump bëri të ditur se marrëveshja duhet të pranohet deri të dielën në orën 18:00 sipas kohës së Uashingtonit.
Plani parashikon:
Ndërprerje të menjëhershme të luftimeve.
Lirimin brenda 72 orëve të 20 pengjeve izraelite që mbahen nga Hamasi dhe dorëzimin e mbetjeve të pengjeve të supozuara të vdekur.
Në këmbim, lirimin e qindra banorëve palestinezë të Gazës që ndodhen në paraburgim.
Sipas burimeve diplomatike, ndërmjetësues arabë dhe turq po ushtrojnë presion ndaj Hamasit për të pranuar propozimin. Megjithatë, një zyrtar i lartë i Hamasit ka paralajmëruar se grupi ka gjasa ta refuzojë marrëveshjen, duke ngritur dyshime mbi mundësinë e një zgjidhjeje të shpejtë.
